کاروباری برادری ریاست اور اپنی مسلح افواج کے ساتھ کھڑی ہے

کراچی (پریس ریلیز): قائم مقام صدر،ایف پی سی سی آئی، ثاقب فیاض مگوں نے آگاہ کیا ہے کہ پاکستان کی پوری کاروباری، صنعتی اور تاجر برادری بھارت کے پاکستان کے خلاف مذموم پروپیگنڈے اور ہمارے دریاؤں کے پانی کو روکنے کی دھمکیوں کے مقابلے میں ریاست پاکستان اور اس کی مسلح افواج کے ساتھ شانہ با شانہ کھڑی ہے۔

اتحاد و یگانگت کا مظاہرہ کرتے ہوئے پاکستان کی پوری تاجر برادری نے جمعہ کو ایف پی سی سی آئی کے ہیڈ آفس میں ایک پریس کانفرنس کا انعقاد کیا؛جس کا مقصد سرحدوں پر بڑھتی ہوئی کشیدگی کے اس وقت میں مسلح افواج کے ساتھ اپنی یکجہتی اور حمایت کا اظہار کرنا تھا۔قائم مقام صدر،ایف پی سی سی آئی، ثاقب فیاض مگوں نے روشنی ڈالی کہ ہندوستان نے ہندوستانی مقبوضہ کشمیر (IoK) پہلگام کے حالیہ واقعے کے فوراً بعد پاکستان کے خلاف اپنے مذموم عزائم اور پروپیگنڈے کو دہرایا ہے؛ جیسا کہ وہ ماضی میں پلوامہ اور دیگر اس جیسے واقعات کے بعد کرتا رہا ہے؛ جو کہ درحقیقت ان کی اپنی واضح سیکورٹی ناکامیاں ہیں۔

قائم مقام صدر،ایف پی سی سی آئی،ثاقب فیاض مگوں نے واضح کیا کہ عملی طور پر پاکستان کی بھارت کے ساتھ پہلے ہی کوئی تجارت نہیں ہو رہی ہے اور انڈیا نے ہمیشہ پاکستانی برآمدات پر نان ٹیرف رکاوٹیں بھی برقرار رکھی ہیں۔ بہر حال، جب ہم انڈیا کے ساتھ تجارت کرتے بھی تھے تو یہ دو طرفہ تجارت کے توازن کے اعتبار سے ان کے حق میں ہی تھا۔

انہوں نے مزید واضح کیا کہ جب انہوں نے پاکستان کے ساتھ تجارت بند کر دی تو انہوں نے خود اپنا تجارتی سرپلس کھو دیا۔ریجنل چیئر مین و نائب صدر،ایف پی سی سی آئی، عبدالمہیمن خان نے تاجر برادری کے اس عزم کا اعادہ کیا کہ وہ پاکستان کی بہادر، پیشہ ورانہ اور انتہائی حوصلہ مند مسلح افواج کی مکمل اور دل و جان سے حمایت کرے گی۔ انہوں نے مزید کہا کہ امن ہماری اولین ترجیح ہے؛ تاہم،تاجر برادری بھی دشمن کے کسی بھی حملے کی صورت میں قوم کے لیے لڑنے کے لیے تیار ہے۔

تاجر برادری کے ایک نہایت تجربہ کار اور محبوب رہنما بشیر جان محمد نے اس موقع پر کہا کہ تاجر برادری کو انڈیاکے ساتھ تمام تجارت کو اس وقت تک روکنا چاہیے کہ جب تک کہ وہ دوستانہ، باہمی احترام اور برابری کے ساتھ پاکستان کے ساتھ اپنے معاملات کو خوش اسلوبی سے حل نہیں کر لیتے۔ نائب صدر،ایف پی سی سی آئی، امان پراچہ نے کہا کہ حقیقت میں یہ انڈیا ہی ہے کہ جس نے ہمیشہ علاقائی تجارت؛ ٹرانزٹ ٹریڈ کے پوٹینشل؛بارڈر مارکیٹس؛ علاقائی تعاون؛ ریجنل تجارتی معاہدوں اور برصغیر پاک و ہند اور اس کے عوام کی اجتماعی اقتصادی بھلائی کے امکانات کو سبوتاژ کیا ہے۔

نائب صدر، ایف پی سی سی آئی، آصف سخی نے کہا کہ ہمارے کاروبار، صنعتیں اور تجارت ہماری مادر وطن پاکستان کی بدولت ہی ہیں۔ نتیجتاً،ہمارا ملک پاکستان ہمارے لیے کسی بھی نا گہانی صورت حال، چیلنج یا قربانی کے وقت سب سے پہلی ترجیح ہوتا ہے۔نائب صدر، ایف پی سی سی آئی، ناصر خان نے بھارت کی اپنے گریبان میں جھانکنے کی صلاحیت پر سوال اٹھایا؛ کیونکہ،اس کی فوج دس لاکھ سے بھی زیادہ ہے؛لہذا،انڈیا کو اپنے شہریوں اور سیاحوں پر حملے کو روکنے کے قابل ہونا چاہیے تھا۔ یہ سرا سر ان کی اپنی سیکورٹی اور انٹیلی جنس کی ناکامی ہے اور پاکستان کا اس واقعے سے کوئی تعلق نہیں ہے۔